საგანმანათლებლო პროექტი ,,კონსტიტუციონალიზმის გაკვეთილები“

პროექტი განხორციელდა სსიპ კონსტიტუციონალიზმის კვლევისა და ხელშეწყობის რეგიონალური ცენტრის ინიციატივით, ორგანიზებითა და დაფინანსებით, და საქართველოს ახალგაზრდა იურისტთა ასოციაციის (საია) მონაწილეობით.

პროექტის მიზანი:

•მოსწავლე-ახალგაზრდებში კონსტიტუციონალიზმის პრინციპების დამკვიდრება, სამართლებრივი კულტურის ამაღლება, საჯარო სამართლის სფეროში სწავლის გაგრძელებისა და ცოდნის დაუფლების სურვილის გაღვივება და სტიმულირება;
•მოსწავლეებში კანონის უზენაესობის, სახელმწიფოს ძირითადი კანონის პრინციპებისა და ნორმებისადმი პატივისცემის, კანონმორჩილების დამკვიდრების ხელშეწყობა;
•მოსწავლეთათვის თავისუფლების კონსტიტუციური იდეის ახსნა-განმარტება, თავისუფალი აზროვნების განვითარების ხელშეწყობა;
•უცხო გარემოში ქცევისა და ერთმანეთთან ურთიერთობის უნარ-ჩვევების გამომუშავება.

პროექტის აღწერილობა:

2011 წელს, პროექტის ფარგლებში, კონსტიტუციონალიზმის კვლევისა და ხელშეწყობის რეგიონალურ ცენტრს ესტუმრა 1300 ვიზიტორი. მათ შორის იყვნენ საქართველოს, კერძოდ, თბილისის, ბათუმის, ქობულეთის, ხელვაჩაურის, ქუთაისის, ზესტაფონის, სამტრედიის, ხონის, წყალტუბოს, ბაღდათის, ვანის, აბაშის, ხობის, სენაკის, ზუგდიდის, გორის, ხაშურის, საგარეჯოს, რუსთავის, საჯარო სკოლების VIII-IX კლასის მოსწავლეები თანმხლებ პედაგოგებთან ერთად.
მოსწავლეებმა დაათვალიერეს კონსტიტუციონალიზმის დარბაზი, სადაც წარმოდგენილია მსოფლიოში კონსტიტუციონალიზმის განვითარების ამსახველი ექსპოზიცია.
მოისმინეს ლექცია კონსტიტუციონალიზმის პრინციპების, საქართველოსა და საზღვარგარეთის ქვეყნების კონსტიტუციური განვითარების ისტორიის შესახებ, ნახეს კონსტიტუციონალიზმის ცენტრში მომზადებული სასწავლო-შემეცნებითი ფილმი ,,კანონთა კანონი“.
მოსწავლეებმა შეავსეს თემატური ტესტები, მონაწილეობა მიიღეს იმიტირებულ სასამართლო პროცესსა და სხვადასხვა ინტელექტუალურ თამაშებში.
სტუმრებმა დაათვალიერეს აჭარის ავტონომიური რესპუბლიკის ღირშესანიშნაობები, ბათუმის ბოტანიკური ბაღი, გონიოს ციხე, ძმები ნობელების მუზეუმი, ხარიტონ ახვლედიანის მხარეთმცოდნეობის მუზეუმი, დელფინარიუმი, ბათუმის ბულვარი.
პროექტში მონაწილეთა შორის, თემატური ტესტების შედეგების საფუძველზე, გამოვლინდნენ საუკეთესო მოსწავლეები, რომელთაც გადაეცათ სამკერდე ნიშნები პროექტის სიმბოლიკით და საქართველოს 1995 წლის 24 აგვისტოს ილუსტრირებული კონსტიტუცია.
პროექტის უკლებლივ ყველა მონაწილეს გადაეცა სამახსოვრო საჩუქრები კონსტიტუციონალიზმის კვლევისა და ხელშეწყობის რეგიონალური ცენტრის სიმბოლიკითა და პროექტში მონაწილეობის დამადასტურებელი სერთიფიკატი.