აჭარის ავტონომიური რესპუბლიკის უმაღლეს საბჭოსა და სსიპ კონსტიტუციონალიზმის კვლევისა და ხელშეწყობის რეგიონალურ ცენტრს  შორის, მიმდინარე წლის 8 მაისს, უმაღლესი საბჭოს ახალი შენობის სხდომათა დარბაზში, ურთიერთთანამშრომლობის მემორანდუმი გაფორმდა.
უმაღლეს საბჭოსა და კონსტიტუციონალიზმის ცენტრს შორის, უკვე დიდი ხნის თანამშრომლობის ტრადიცია არსებობს, აღნიშნული მემორანდუმის გაფორმება, კიდევ ერთხელ ცხადყოფს თანამშრომლობის გაგრძელებისა და გაღრმავების სურვილს, - აღნიშნა უმაღლესი საბჭოს თავმჯდომარემ ბატონმა მიხეილ მახარაძემ.
მემორანდუმის ფარგლებში შესაძლებელი იქნება უმაღლესი საბჭოსა და სხვა კოლეგიური ორგანოების თანამშრომლების საგანმანათლებლო საქმიანობაში ჩართვა, დასძინა თავის მხრივ ბატონმა ავთანდილ დემეტრაშვილმა, რომელმაც კიდევ ერთხელ დაადასტურა, რომ მიმდინარე წლის ზაფხულსა და შემოდგომაზე ბათუმი უმასპინძლებს უკვე რიგით II საერთაშორისო სტუდენტურ ოლიმპიადას ეროვნულ და შედარებით კონსტიტუციურ სამართალში, გაიმართება საერთაშორისო საზაფხულო სკოლა. აჭარის ავტონომიური რესპუბლიკა, ცენტრის მიერ შემუშავებული ინიციატივის ,,სამოქალაქო განათლების ხელშეწყობა“, ფარგლებში უმასპინძლებს IX კლასელ მოსწავლეებს საქართველოს სხვადასხვა კუთხიდან.
მემორანდუმი მიზნად ისახავს:

• კონსტიტუციონალიზმის პრინციპების, სახელმწიფოს ძირითადი კანონის ნორმებისადმი პატივისცემის, კანონის უზენაესობისა და კანონმორჩილების დამკვიდრების ხელშეწყობა.
• საზოგადოებაში კონსტიტუციონალიზმის იდეის განმარტება და პოპულარიზაცია.
• საქართველოს კონსტიტუციური ისტორიისა და პრობლემატიკის შესწავლის ხელშეწყობას.
• ცენტრის საგანმანათლებლო პროექტებში მონაწილე მოსწავლე-ახალგაზრდობის, აჭარის ავტონომიური რესპუბლიკის უმაღლეს საბჭოში სტუმრობას და ინფორმაციის მიწოდებას აჭარის ავტონომიური რესპუბლიკის სტატუსის, ავტონომიის მოწყობისა და ორგანიზების შესახებ.
• უმაღლესი საბჭოს წევრის, ფრაქციის ან კომისიის თხოვნით დასკვნის მომზადება უმაღლესი საბჭოს მიერ ინიცირებული კანონპროექტის საქართველოს კონსტიტუციასა ან/და აჭარის ავტონომიური რესპუბლიკის კონსტიტუციასთან შესაბამისობის დადგენის მიზნით.

შეხვედრის დასასრულს, ბატონმა ავთანდილ დემეტრაშვილმა მიულოცა უმაღლესი საბჭოს წევრებს ახალ შენობაში გადასვლა.