3 სექტემბერს ბათუმში გაიხსნა II საერთაშორისო სტუდენტური ოლიმპიადის ფინალური ეტაპი  ეროვნულ და შედარებით კონსტიტუციურ სამართალში.
ღონისძიებაში, რომელიც კონსტიტუციონალიზმის კვლევისა და ხელშეწყობის რეგიონალური ცენტრის ინიციატივითა და ორგანიზებით ტარდება, მონაწილეობენ პროფესორ-მასწავლებლები და სტუდენტები შვიდი სახელმწიფოს (აზერბაიჯანი, ბულგარეთი, მოლდოვა, რუსეთი, საქართველო, სომხეთი, უკრაინა) წამყვანი უმაღლეს სასწავლებლებიდან.

ფინალურ ეტაპს, აღნიშნულ სახელმწიფოებში, წინ უსწრებდა შიდასაუნივერსიტეტო და შიდარესპუბლიკური შესარჩევი ტურები. ოლიმპიადის ფინალურ ეტაპზე მონაწილე სახელმწიფო წარმოდგენილია რამდენიმე სტუდენტით.
ოლიმპიადა გახსნა და დამსწრე საზოგადოებას მისასალმებელი სიტყვით მიმართა კონსტიტუციონალიზმის კვლევისა და ხელშეწყობის რეგიონალური ცენტრის ხელმძღვანელმა ავთანდილ დემეტრაშვილმა. ,,დარწმუნებული ვარ ისე როგორც 2011 წელს, როცა პირველად შევიკრიბეთ საერთაშორისო სტუდენტური ოლიმპიადის ფარგლებში, ამჯერადაც ჩვენი შეხვედრა, ახლა უკვე უფრო გაფართოებული შემადგენლობით,  მაქსიმალურად ხელს შეუწყობს რეგიონის სახელმწიფოთა შორის კონსტიტუციონალიზმის სფეროში საერთაშორისო თანამშრომლობის გააქტიურებას. კერძოდ კონსტიტუციური სამართლით დაინტერესებულ სტუდენტებს შორის კონტაქტების დამყარებას და გაღრმავებას“, - განაცხადა ავთანდილ დემეტრაშვილმა.
ოლიმპიადის მონაწილეებს მიესალმნენ აჭარის ავტონომიური რესპუბლიკის უმაღლესი საბჭოს თავმჯდომარე მიხეილ მახარაძე და II საერთაშორისო სტუდენტური ოლიმპიადის ჟიურის თავმჯდომარე ლევან იზორია.
3 სექტემბერს სტატიათა პრეზენტაციით ჟიურის წინაშე წარსდგნენ:
არზუ ჰასანოვა
თემა - ,,სამართლიანი სასამართლოს უფლება“ (აზერბაიჯანი);
ზოხრაბ მოჰარრამოვი
თემა - ,,შეკრების თავისუფლების სამართლებრივი რეგულირება აზერბაიჯანის რესპუბლიკაში“ (აზერბაიჯანი)
სიმონა ველევა
თემა - ,,სიტყვის თავისუფლება ევროპასა და ამერიკის შეერთებულ შტატებში“ (ბულგარეთი);
ალექსანდრა დიმიტროვა
თემა - ,,სასამართლოს დამოუკიდებლობის გარანტიები“ (ბულგარეთი);
სილვა კალანჩა
თემა - ,,საკანონმდებლო აქტების კონსტიტუციურობის კონტროლი“ (მოლდოვა);
მირჩა გლადკი
თემა - ,,ეკონომიკური უსაფრთხოების კონსტიტუციური ასპექტები“ (მოლდოვა)
გიორგი დავითური
თემა - ,,მთავრობის სოლიდარული პასუხისმგებლობა: შედარებითი ანალიზი და 2010 წლის საკონსტიტუციო რეფორმა საქართველოში“ (საქართველო);
თამარ ქოჩაკიძე
თემა - ,,კონსტიტუციური დიალოგი სასამართლო და საკანონმდებლო ხელისუფლებას შორის  ადამიანის უფლებების საკითხზე“ (საქართველო).

  4 სექტემბერს სტატიათა პრეზენტაციით ჟიურის წინაშე წარსდგებიან სომხეთის, რუსეთისა და უკრაინის წარმომადგენლები
საკონკურსო სტატიათა პრეზენტაციის შედეგების საფუძველზე, ჟიური გამოავლენს ყოველი სახელმწიფოდან ერთ გამარჯვებულს.
ოლიმპიადაში მონაწილეთათვის სხვადასხვა ნომინაციებში პრიზები დააწესეს საქართველოს საკონსტიტუციო სასამართლომ, აჭარის ავტონომიური რესპუბლიკის უმაღლესმა საბჭომ, აჭარის ავტონომიური რესპუბლიკის განათლების, კულტურისა და სპორტის სამინისტრომ, გერმანიის საერთაშორისო თანამშრომლობის საზოგადოებამ და საქართველოს ახალგაზრდა კონსტიტუციონალისტთა ასოციაციამ.
II საერთაშორისო სტუდენტური ოლიმპიადის მონაწილეები 5-7 სექტემბერს მონაწილეობას მიიღებენ საერთაშორისო სტუდენტურ საზაფხულო სკოლაში, სადაც ლექციებს წაიკითხავენ პროფესორ-მასწავლებლები ოლიმპიადაში მონაწილე სახელმწიფოთა წამყვანი უმაღლეს სასწავლებლებიდან.