21 თებერვალს კონსტიტუციონალიზმის კვლევისა და ხელშეწყობის რეგიონალური ცენტრის ინიციატივით ქ. თბილისის მოსწავლე-ახალგაზრდობის სასახლეში საზეიმოდ გაიხსნა საქართველოს 1921 წლის 21 თებერვლის კონსტიტუციის მიღების 90 წლისთავისადმი მიძღვნილი მემორიალური დაფა.
ცერემონიას ესწრებოდნენ საქართველოს საკონსტიტუციო სასამართლოს თავმჯდომარე გიორგი პაპუაშვილი, საქართველოს პარლამენტის თავმჯდომარის პირველი მოადგილე მიხეილ მაჭავარიანი, პოლიტიკურ პარტიათა, სამეცნიერო წრეებისა და მასობრივი ინფორმაციის საშუალებათა წარმომადგენლები.
კონსტიტუციონალიზმის კვლევისა და ხელშეწყობის რეგიონალური ცენტრის  ხელმძღვანელმა ავთანდილ დემეტრაშვილმა მადლობა მოახსენა დამსწრე საზოგადოებას მობრძანებისათვის, ისაუბრა პირველი კონსტიტუციის ტექსტის შემუშავებისა და საქართველოს დამფუძნებელი კრების მიერ მისი მიღების პერიპეტიებზე. მან ხაზგასმით აღნიშნა საქართველოსთვის ურთულეს ისტორიულ მონაკვეთში კონსტიტუციის მიღების მნიშვნელობა, კონსტიტუციისა, რომელიც შემდგომ საფუძვლად დაედო დამოუკიდებელ საქართველოში საკონსტიტუციო პროცესის განვითარებას.
"დღეს, სწორედ იმ დარბაზში, სადაც 90 წლის წინათ საქართველოს დამფუძნებელმა კრებამ მიიღო საქართველოს კონსტიტუცია, ჩვენ გავხსენით მემორიალური დაფა,  რომელიც დარჩება შთამომავლობას როგორც საქართველოს პირველი დემოკრატიული რესპუბლიკის, დამოუკიდებელი ქართული სახელმწიფოს და მისი დამფუძნებლების სამართალშემოქმედების სიმბოლო", - განაცხადა ავთანდილ დემეტრაშვილმა.
 საქართველოს საკონსტიტუციო სასამართლოს თავმჯდომარემ გიორგი პაპუაშვილმა და საქართველოს პარლამენტის თავმჯდომარის პირველმა მოადგილემ მიხეილ მაჭავარიანმა  ისაუბრეს 1921 წლის 21 თებერვლის კონსტიტუციის მნიშვნელობაზე და ქართველ პოლიტიკოსთა იმ თაობის ღვაწლზე, რომელმაც  1918-21 წლებში დააფუძნა პირველი დემოკრატიული რესპუბლიკა და მიიღო საქართველოს ისტორიაში პირველი კონსტიტუცია.